Конзерваторско-реставраторски работи на објект од староградска архитектура на ул. Гоце Делчев бр. 55-57 во Штип
Опис на проектот
Објектот на улицата Гоце Делчев бр. 55 и 57 во Штип е тип на карактеристична староградска архитектура од крајот на 19 век. Се наоѓа во непосредна близина на центарот на Штип, а со источната фасада излегува на главната улица. Куќата била на еден сопственик, што е видливо по нејзината концепција и архитектонска композиција. Во некој период, куќата е поделена на двајца сопствениви, така да сега се води на две катастарски парцели. Сопствениците на куќата со број 55, имале извршено поправки и несоодветни интервенции на целата куќа, со што оваа куќа пред нејзината реставрација имаше изгубено од нејзината автентичност. Додека другиот дел од куќата со број 57 беше сочувана во оригинална состојба со оштетувања.
Куќата е градена на традиционален начин и тоа во бондрук конструкција, во приземјето со исполна од тула, а на катот со дасчана оплата од штички. Користен е варов малтер и фасадна бела боја. Оригиналните прозорци се дрвени двокрилни со опшив. Катот конзолно е исфрлен со декоративни косници. На аглите од куќата и помеѓу прозорците изведени се декоративни пиластри со капители. Кровната конструкција е дрвена, а кровниот покривач е од ориентална ќерамида.
Со извршената конзервација, санација и реставрација на објектот, вкучувајќи обнова на фасадата, замена на кровот и целокупната столарија. На делот од објектот со број 55 вратена е автентичната состојба, аналогно на делот од куќата со број 57 и со тоа повторно формирана е целина од овој објект.